मौसमले गर्दा जहाज समयमा अवतरण हुन नसक्दा यात्रु आकाशमै बेहोस।
काठमाडौंबाट ६९ जना यात्रु लिएर नेपालगञ्जका लागि उडेको बुद्ध एयरको जहाज पौने घण्टा आकाशमै होल्ड भएको छ । बुद्धको कल साइन ९ एन–एजेएक्सको जहाज झण्डै पौने घन्टापछि मात्र नेपालगञ्ज विमानस्थलमा अवतरण गरेको हो।
आज बिहान ७ बजेर ४४ मिनेटमा उडेको जहाज ९ बजेर १८ मिनेटमा नेपालगञ्ज विमानस्थलमा अवतरण भएको हो । बिहान ८ बजेर ४० मिनेटमा अवतरण हुनुपर्ने विमान ल्याण्ड हुन नसकेपछि आकाशमै होल्डमा राखिएको सुरक्षा निकट स्रोतले जनाएको छ।
ढिलो अवतरण गराइएको जहाजमा एक यात्रु बेहोस अवस्थामा भेटिएका छन् । विमानमा रहेकी एक महिला यात्रु बेहोस अवस्थामा फेला परेको र उनको राँझास्थित नेपाली सेनाको अस्पतालमा उपचार भइरहेको बाँके प्रहरीले जनाएको छ। बेहोस अवस्थामा भेटिएकी यात्रुको समाचार तयार पार्दासम्म होस आउन नसकेको बाँकेका प्रहरी नायव उपरीक्षक मधुसुदन न्यौपानेले जानकारी दिएका छन् ।
यो खबर पढेर तपाईलाई कस्तो महसुस भयो ?
+1
+1
+1
+1
+1
