अक्टोबरमा भएको अघिल्लो ‘नो किंग्स’ विरोध प्रदर्शनको तुलनामा यसपटक लगभग ६०० बढी कार्यक्रमहरू आयोजना गरिएको थियो।

प्रदर्शनकारीहरूले ट्रम्प प्रशासनका धेरै नीतिप्रति आक्रोश पोखेका छन्। उनीहरूको क्रोध विशेष गरी इरानसँगको बढ्दो तनाव, कडा आप्रवासन नियमहरू र बढ्दो मुद्रास्फीतिमा केन्द्रित रहेको समाचारमा उल्लेख छ। धेरै स्थानमा मानिसहरूले ट्रम्प र उपराष्ट्रपति जे.डी. भान्सविरुद्ध पोस्टरहरू प्रदर्शन गर्दै उनीहरूलाई पदबाट हटाउन माग गरेका थिए।

ट्रम्पविरुद्ध हालसम्म तीनवटा राष्ट्रिय ‘नो किंग्स’ विरोध प्रदर्शन भएका छन्। पहिलो ठूलो प्रदर्शन जुन २०२५ मा भएको थियो भने दोस्रो अक्टोबर २०२५ मा। तेस्रो विरोध प्रदर्शन शनिबार भएको हो।

प्रदर्शनका क्रममा दर्जनौँ मानिसलाई नियन्त्रणमा लिइएको समाचार संस्था एपीले जनाएको छ। लस एन्जलसका अधिकारीहरूले संघीय हिरासत केन्द्र नजिकै अश्रुग्यास प्रयोग गरेर दर्जनौँलाई पक्राउ गरेका छन्। लस एन्जलस प्रहरीका अनुसार ७४ जना पक्राउ परेका छन्।

सयौँ प्रदर्शनकारीले लस एन्जलस शहरको एक संघीय परिसरलाई घेराउ गरेपछि केहीले अधिकारीहरूमाथि ढुङ्गा, बोतल र कंक्रीट क्रेनका टुक्राहरू प्रहार गरेका थिए।

ह्वाइट हाउसले यी विरोध प्रदर्शनहरूलाई ‘थेरापी सेसन’को रूपमा टिप्पणी गरेको छ। यसले जनतालाई खासै असर नगर्ने ह्वाइट हाउसको दाबी छ। यसैबीच, ट्रम्पले आफ्ना निर्णयहरू देशलाई बलियो बनाउने उद्देश्यले प्रेरित भएको बताएका छन्। उनले आफू राजा नभएको र आफूविरुद्ध लगाइएका आरोपहरू झूटा भएको दाबी समेत गरे।

ट्रम्प विरुद्धको यो आक्रोश संयुक्त राज्य अमेरिकामा मात्र नभई विश्वका अन्य भागमा पनि देखिएको छ। पेरिस, लन्डन र लिस्बनजस्ता शहरहरूमा पनि मानिसहरूले ट्रम्पको विरोध गर्दै उनलाई पदबाट हटाउन माग गर्दै सडकमा उत्रिएको समाचारमा उल्लेख छ।