अमेरिकी राष्ट्रपति डोनाल्ड ट्रम्पले बिनाशर्त आत्मसमर्पण गर्न इरानलाई चेतावनी दिएका छन् । सामाजिक संजालमा पोष्ट गर्दै उनले आफूहरूको धैर्यताको बाँध टुट्नुअघि नै आत्मसमर्पण गर्न इरानलाई चेतावनी दिएका हुन् । ‘हाम्रो धैर्यताको बाँध अब टुट्न लागेको छ, बिनाशर्त आत्मसमर्पण गर,’ उनले लेखेका छन् ।

लगातार पोष्ट गर्दै ट्रम्पले इरानी सुप्रिम लिडर कहाँ छन् भन्ने थाहा भए पनि तत्काल उनको ज्यान नलिने बताएका छन् । ‘हामीलाई सुप्रिम लिडर भनेर चिनिने व्यक्ति कहाँ लुकेको छ भन्ने कुरा ठ्याक्कै थाहा छ । उनी सजिलो लक्ष्य हुन्,’ उनले भनेका छन्, ‘तर उनी त्यहाँ सुरक्षित छन् । हामी उनलाई मार्ने छैनौँ । कमसेकम अहिले चाहिँ हत्या गर्दैनौँ ।’ट्रम्पले नागरिक वा अमेरिकी सैनिकहरूमाथि मिसाइल प्रहार भएको हेर्न नचाहेको बताएका छन् । उनले इरानको आकाशमा पूर्ण नियन्त्रण कायम गरिसकेको बताएका थिए । उनले भने, ‘हामीसँग अब इरानको आकाशमा पूर्ण नियन्त्रण छ ।’

अमेरिकाले लामो समयदेखि इजरायललाई सैन्य सहयोग र उपकरणहरू प्रदान गरिरहेको छ । तर, शुक्रबारदेखि आक्रमण शुरू भएपछि आधिकारिक रूपमा अमेरिका इजरायली हमलामा संलग्न नभएको बताइरहेको थियो ।

क्यानडामा जी–७ बैठकबाट छिटो फर्केपछि बिहान एकदम शान्त देखिएका ट्रम्पले अहिले सामाजिक संजालमा चिन्ताजनक पोष्ट गरेको बीबीसीले जनाएको छ ।

इरान आक्रमणमा अमेरिकी संलग्नता नरहेको बताउने ट्रम्पले प्रयोग गरेको भाषाले अमेरिका इजरायलको साथमा रहेको र इरानविरुद्धको आक्रमणमा प्रत्यक्ष संलग्न भएको स्पष्ट पारेको बीबीसीले उल्लेख गरेको छ । यसअघि ट्रम्पले इरान र इजरायलबीचको युद्धविरामको ‘सबैभन्दा राम्रो आशा’ गरिरहेको बताएका थिए । ​

ट्रम्पले इरानलाई चेतावनीमा बिना शर्त आत्मसमर्पणको माग गरेपछि इजरायल र इरान छैटौं दिन हमला गरिरहेका छन् ।

उता, इरानी सर्वोच्च नेता अयातोल्लाह अली खामेनीले युद्ध शुरू भएको बताएका छन् । ‘हामी आतंकवादी यहूदी शासनलाई कडा जवाफ दिनेछौं। हामी उनीहरूलाई कुनै दया देखाउने छैनौं।’ उनको यो घोषणापछि इरानले इजरायलमा २५ वटा मिसाइल प्रहार गरेको हो ।

धेरै मिडिया रिपोर्टहरूका अनुसार, अमेरिका पनि चाँडै यो युद्धमा सामेल हुन सक्छ। राष्ट्रपति ट्रम्पले क्यानडाबाट फर्केपछि ह्वाइट हाउसमा राष्ट्रिय सुरक्षा टोलीसँग बैठक गरेका थिए । यसपछि, अमेरिकाले मध्य पूर्वमा थप लडाकु विमान पठाउने निर्णय गरेको थियो ।

इजरायल र इरानबीचको संघर्षमा अमेरिकाले सैन्यरूपमा संलग्न हुने योजना बनाइरहेको समाचारहरू आउँदै गर्दा अमेरिकी लडाकू जेटहरू इङ्ल्यान्डको पूर्वी क्षेत्रमा रहेको रोयल एयर फोर्स लेकनहिथ अड्डाबाट उडेका छन् ।

एक फोटोग्राफरले लिएका तस्बिरहरूमा कम्तिमा एफ–३५ लडाकू जेटहरू रोयल एयर फोर्स लेकनहिथ अड्डाबाट उडान भर्दै गरेका देखिएका छन् । यी जेटहरूसँग एयर रिफ्युलिंग ट्यांकर विमान (इन्धन आपूर्ति गर्ने विमान) पनि थिए ।

यसका साथै, दुवै देशहरूमा नयाँ मृत्युको संख्या पनि बाहिर आएको छ।

गैर-नाफामुखी संस्था मानव अधिकार कार्यकर्ताहरू इरानले दुई देशहरूबीच बम विस्फोट शुरू भएदेखि नै हताहतको संख्या ट्र्याक गरिरहेको छ।

उसकाअनुसार इजरायली आक्रमणमा इरानमा २२४ जना सर्वसाधारण मारिएका छन् भने १८८ जना घाइते भएका छन्। साथै, उनीहरूले इरानका १०९ जना सैन्य कर्मचारी पनि मारिएको र १२३ जना घाइते भएको बताएका छन्।

यसबाहेक ११९ जना मारिएका छन्, जसको पहिचान हुन सकेको छैन । यी सबै मिलेर ४५२ जनाको मृत्यु भएको छ र ६४६ जना घाइते भएका छन् । इरानको सरकारी मिडिया अहिलेसम्म मृत्युको संख्याको बारेमा मौन छ।

इजरायलको स्वास्थ्य मन्त्रालयले हिजो राति (सोमबार)देखि १५४ जना घाइते भएकाहरूलाई इजरायली अस्पतालमा लगिएको जानकारी दिएको छ। इजरायलले शुक्रबारदेखि इरानी आक्रमणमा कम्तिमा २४ जना मारिएको दाबी गरेको छ।

इजरायलले जुन १३ मा इरानको ‘आणविक कार्यक्रम’सँग सम्बन्धित अड्डाहरूमा आक्रमण गरेको थियो।

इजरायली सेनाले सोमबार राति हवाई आक्रमणमा एक वरिष्ठ इरानी सैन्य कमाण्डर अली शादमानीलाई मारेको दाबी गरेको छ।