आज तिहारको मुख्य दिन लक्ष्मीपूजा , हरेक घरघरमा धनकी देवी लक्ष्मीको पूजा श्रद्धा सहित गरिएको छ । बिहीबार साँझ हिन्दू धर्मावलम्बीहरुले आफ्नो घर, कार्यालय, उद्योग व्यवसायमा धनकी देवी लक्ष्मीको पूजा गरेका छन् ।

घर तथा कार्यालयहरुमा सयपत्री र मखमली फूल, बत्तीको झिलिमिली तथा  विभिन्न रंग राखेर आकर्षक रंगोलीहरु  बनाइएको छ ।

सफासुग्घर र लिपपोत नगरिएको घरमा लक्ष्मीले बास गर्दिनन् भन्ने मान्यताका आधारमा आज बिहानै घर सफासुग्घर र लिपपोत गरी दीपावली गरेर लक्ष्मीलाई आमन्त्रण गरिएको छ। घरका झ्याल, ढोका, चोटा, कोठा, सङ्घार, कौसी, अटाली, भर्याङलगायत स्थानमा सरसफाइ गरिएका छन्।

लक्ष्मीको पूजापछि घरको गेट तथा मूलढोका पनि खुला राख्ने गरिन्छ । यसरी मूल ढाेका खुला राख्नाले घरमा लक्ष्मीकाे आगमन हुने जनविश्वास रहेकाे छ ।

प्रत्येक वर्ष कार्तिक कृष्ण त्रयोदशीदेखि कार्तिक शुक्ल द्वितीयासम्म मनाइने हिन्दूको दोस्रो ठूलो चाँड यमपञ्चक अर्थात् तिहार मङ्गलबारदेखि सुरु भएको हो। चान्द्रमासअनुसार कार्तिक कृष्ण त्रयोदशीदेखि शुक्ल द्वितीयासम्म पाँच दिन झिलीमिलीको पर्व तिहार मनाइन्छ।

लक्ष्मीपूजापछि घरघरमा बालिएको बत्तीका कारण काठमाडौं सहर लगायत देशभर उज्यालोले झिलमिल छाएकाे छ ।