पार्टीको नीति र नेतृत्वविरुद्ध भइरहेको घेराबन्दी, षड्यन्त्र र फैलाइएका एक–एक भ्रमहरूको डिजिटल साइबर फोर्समार्फत् प्रतिवाद गर्ने नेताहरूले बताएका छन् । लहलहैमा लागेर कुनै पनि सदस्यले पार्टीको नीति र नेतृत्वविरुद्ध नलेख्नसमेत प्रदेश कमिटीले उर्दी गरेको छ । नीति र नेतृत्वविरुद्ध लेख्नेलाई  कडा कारबाही गर्नेसमेत उल्लेख छ ।

एमालेले पार्टीका सदस्यहरूको सामाजिक सञ्जालको अकाउन्टसमेत जाँच गर्ने भएको छ ।  झुटा आरोप र भ्रमपूर्ण कुराहरूको खण्डन सामाग्रीसमेत तयार गरेर पार्टीले तयार गरेको ग्रुपमा पठाउन मातहतका कमिटीलाई पार्टीले निर्देशन गरेको छ ।   डिजिटल डेस्क स्थापना गर्दा लाग्ने खर्च भने सम्बन्धित कमिटीले व्यहोर्ने उल्लेख गरिएको छ । साइबर हमलाको प्रतिवाद गर्न स्मार्ट शैली अपनाएको एमालेले जनाएको छ । माघ महिनाभित्र सामाजिक सञ्जाल चलाउने नेता, कार्यकर्ता र सदस्यको विवरण सङ्कलन गर्ने भएको छ ।

पार्टीको नेतृत्वप्रति सामाजिक सञ्जालमा साइबर हमला भएपछि प्रतिवाद गर्न यस्तो योजना बढाएको नेताहरूले बताएका छन् । ‘अध्यक्ष केपी शर्मा ओली प्रधानमन्त्री भएपछि सामाजिक सञ्जालमा चर्को आलोचना हुन थालेको छ,’ एक नेताले भने, ‘त्यसपछि प्रदेश कमिटीलाई समेत आलोचनाको प्रतिवाद गर्नेगरी योजना बनाउने भन्ने निर्देशन नै थियो । त्यहीअनुरूप निर्णय भएको हो ।’

यस्तै एमालेले विदेशमा गएका युवाहरूको तथ्याङ्क र नाम समावेश गरेर केन्द्रीय सङ्गठन विभागमा पठाउन पनि परिपत्र गरेको छ । मिसन ८४ निर्वाचन केन्द्रित गतिविधिसमेत गर्नेगरी प्रदेश कमिटीले परिपत्र गरेको छ । निर्वाचनको बुध सुरक्षा प्रयोजनका लागि २५ जना युवाहरूको रोष्टर बनाई आवश्यक प्रशिक्षणसहित युवाको कमान्डमा निर्वाचन केन्द्रित युवा विशेष परिचालनको तयारी गर्न एमालेले निर्देशन गरेको छ ।