पत्रकार दिवाकर साहले प्रतिनिधिसभा निर्वाचनका लागि धनुषा क्षेत्र नम्बर ३ बाट स्वतन्त्र उम्मेदवारी दर्ता गराएका छन्। साहले निर्वाचन आयोगको कार्यालय पुगेर आज आफ्नो उम्मेदवारी दर्ता गराएका हुन्।

उम्मेदवारी दर्तापछि सञ्चारकर्मीसँग प्रतिक्रिया दिँदै उनले दलगत राजनीतिभन्दा बाहिर रहेर जनताको वास्तविक मुद्दा संसदमा उठाउने उद्देश्यले स्वतन्त्र उम्मेदवारी दिएको बताए। उनका अनुसार शिक्षा, स्वास्थ्य, रोजगारी, सुशासन  उनका प्रमुख एजेन्डा रहनेछन्।

“धनुषा–३ का नागरिक वर्षौंदेखि आधारभूत समस्याबाट पीडित छन्। ती समस्याको समाधानका लागि जनताकै आवाज बनेर संसदमा पुग्न चाहन्छु,” साहले भने।

लामो समयदेखि पत्रकारितामा सक्रिय रहेका साह स्थानीय तथा राष्ट्रिय मुद्दामा निरन्तर कलम चलाउँदै आएका छन्। उनको उम्मेदवारीले धनुषा–३ मा वैकल्पिक राजनीतिक बहस सुरु हुने अपेक्षा गरिएको छ।

धनुषा क्षेत्र नम्बर ३ मा यसपटक विभिन्न राजनीतिक दलका उम्मेदवारसँगै स्वतन्त्र उम्मेदवारको उपस्थितिले निर्वाचन प्रतिस्पर्धा थप चासोपूर्ण बन्ने देखिएको छ।

निर्वाचन आयोगका अनुसार उम्मेदवारी दर्ता प्रक्रिया निर्धारित कार्यतालिकाअनुसार शान्तिपूर्ण रूपमा अगाडि बढेको छ।